Futboll

Fundjavë shqiptarësh, 10 gola nga 6 shqiptarë në Europë dhe Australi

10 gola të shënuar nga 6 shqiptarë gjatë kësaj fundjave në kampionatet e vendeve të Europës dhe Australisë. Hamdi Salihi u bë protagonist i pa diskutueshëm këtë fundjavë duke shënuar 4 gola për ekipin e tij Viener Neusdadt në ligën e dytë të Austrisë. Dy gola me penallti dhe dy të tjerë me aksion jo vetëm i dhanë fitoren ekipit të Neusdadt, por njëkohësisht Salihi është përkohësisht dhe shënuesi më i mirë në ligën e dytë austriake.

Migjen Basha gjithashtu u bë protagonist i ekipit të Barit në Itali, duke shënuar dy gola në ndeshjen kundër Cittadella. Ekipi i Bashës fitoi ndeshjen dhe u ngjit në vendin e tretë në klasifikim dhe tashmë kërkon të bëjë hapa para drejt ngjitjes në Serinë A.

Besart Berisha, ish-sulmuesi i ekipit kombëtar shqiptar, shënoi golin e parë sezonal për ekipin e tij Melbourne Victory në Australi. Edhe pse ekipi i shqiptarit nga Kosova barazoi, sërisht goli i Berishës ishte shumë i rëndësishëm për ekipin.

Vetëm pak orë para ndeshjes gazetat kroate e cilësuan si “lojtarin e derbit” dhe ashtu rezultoi të ishte dhe në ndeshjen e fundit. Eros Grezda shënoi golin e parë kundër Rijekas, të cilën ekipi i Osijek e mundi. Sulmuesi i krahut i ekipit kuqezi, shënoi sërish duke konfirmuar se është një talent i padiskutueshëm dhe një zbulim me shumë vlerë për ekipin kombëtar shqiptar.

Milot Rashica nuk zhgënjen më, ai konfirmohet çdo ditë si një talent në futbollin europian. Heerneveen ishte viktima e radhës e kosovarit, që shënoi golin e parë në fitoren e thellë të Vitesse. Tashmë Igli Tare duhet të jetë bindur plotësisht se talenti i Rashicës është më shumë se i rëndësishëm për Lazion.

Christian Panucci u duk disi i dëshpëruar kur u pyet për të ardhmen e Albian Ajetit, vëllait të Arlind Ajetit. Me të drejtë ishte dëshpërimi i teknikut të kombëtares, pasi Zvicra mund ta ketë bërë ftesën gati për talentin shqiptar që vijon serinë e golave me Bazelin. Nëse Albian Ajeti do ti bashkohet ekipit kombëtar shqiptar, së bashku me Eros Grezdën mund të përbëjnë një sulm të frikshëm.

 

Më shumë nga Futboll