Kampionati Shqiptar

Kamza denoncon padrejtësitë, letër të hapur Armand Dukës

Kamza shikon komplot të organizuar ndaj saj. Drejtuesit e debutuesve në Superiore mendojnë se po punohet që skuadra e tyre të zbresë nga elita e futbollit tonë këtë sezon, me qëllim që të favorizohen të tjerë. Përmes një letre publike, presidenca e klubit në fjalë shpreh gjithçka:

“I nderuar z.Armand Duka, duke marrë shkas nga ngjarjet e fundit, në ndeshjet e skuadrës sonë, KF Kamza ka analizuar me kujdes dhe gjakftohtësi çdo detaj në vendimet arbitrare dhe jo vetëm. Në përfundim të analizës sonë profesionale, kemi dalë në konkluzion se ka një skenar haptazi ndaj skuadrës sonë.

Me këtë konstatim nuk kërkojmë absolutisht të anashkalojmë përgjegjësitë e skuadrës sonë, por kërkojmë një gjykim “Fair-Play”, edhe pse, duke parë tashmë pozicionin e këtij institucioni kundër Kamzës, tashmë e tutje do të jetë tepër e vështirë.

Por detyra jonë, pavarësisht xhunglës, ku ndodhet futbolli shqiptar, është që t’i shkojmë deri në fund luftës, betejë pas beteje, pa u dorëzuar dhe duke besuar te forca e skuadrës sonë dhe një kthese të vendimeve arbitrare kundra nesh.

Duke u ndalur vetëm në konstatimet e 5 takimeve të fundit, vërejmë:
1. Ndeshja e javës së 25-të, Flamurtari-Kamza 2-2.
Penallti e dyshimtë në favor të Flamurtarit në golin e barazimit 2-2. Kamara në pozicion jashtë loje në aksionin e 11-metërshit.
2. Java e 26-të, Laci-Kamza 2-0.
Karton i kuq për Frashërin (18′). Penallti e paakorduar për Sebino Plakun
3. Java e 27-të, Kamza-Partizani 0-1.
Harkim në zonë nga Zguro, Batha prek topin me dorë, por loja vazhdon.
4. Java e 28-të, Kamza-Kukësi 0-1.
Racic pengohet në zonë nga Shameti, kryesori Xhaja vazhdon lojën.
5. Java e 29-të, Skënderbeu-Kamza 3-2.
Penallti e paqenë për Xhejmsin. Penallti e rregullt për Kamzën, në gjuatjen e Plakut, por kryesori Hamiti “është verbuar”.

I bëjmë thirrje çdo zyrtari pranë FSHF-së, që nga ky moment e në vazhdim të jenë shumë të kujdesshëm në vendimet e tyre dhe të zbatojnë rregullat e garës me përpikmëri e ndershmëri. Ky kampionat është në një moment delikat dhe ne nuk do të lejojmeëaskënd që të tallet apo nëpërkëmbë investimet tona të pastra dhe serioze.

Gjithashtu, ftojmë të gjithë opinionin sportiv dhe mediat në Shqipëri që të skanojnë e transmetojnë çdo detaj të rasteve, ku skuadra jonë sulmohet me një skenar të turpshëm. Pak kohë më parë skuadrën tonë e konsideruan suprizën e kampionatit, por ky fakt shqetësoi dikënd, të cilit Kamza i duket një skuadër e vogël, por ne përfaqësojmë qytetin dhe emrin tonë, sado i vogël apo i madh që të jetë.

Do të ishte e udhës që ndeshjet tona të luhen në sinkron me skuadrat e tjera rivale dhe jo një ditë më parë.


Klikoni butonin “send to messenger” për të marrë lajmet e fundit me mesazh, zgjidhni ekipin ose sportin tuaj të preferuar


Më shumë nga Kampionati Shqiptar