Sezoni 2019 te makina Williams ka nisur në mënyrën më të keqe të mundshme. Asnjë pikë pas 8 garave të para ka bërë që makina legjendare britanike të jetë në krizë.
Edhe pse këtë vit u rikthye në pistë Robert Kubica (piloti tjetër është George Russell), makina britanike nuk arrin të bëjë një paraqitje të mirë. Madje në çdo garë, Williams është renditur në dy vendet e fundit.
E vetmja notë pozitive është se njëvendëshet Williams gjithnjë e kanë mbyllur garën, çka tregon se motori Mercedes që ato përdorin është i besueshëm, por jo aq i shpejtë. Edhe pse makina që kryeson botërorin është pikërisht një Mercedes.
Kjo situatë ka sjellë largimin e shefit të garave, një prej ekspertëve të Formula 1, Paddy Lowe (ka fituar 7 tituj me pilotë të ndryshëm). I rikthyer 3 vite më parë, ai sheh se nuk mund të bëjë më asgjë, ndaj ka dhënë dorëheqjen nga Williams.
“Pas një periudhë reflektimi, mora vendimin për t’u larguar. I uroj skuadrës dhe kolegëve të mi suksese. Falënderoj fansat për mbështetjen e madhe”, thotë Lowe, që erdhi nga Mercedes në vitin 2017.