I freskët nga një sezon i hidhur, i cili përfundoi me zhgënjimin e eliminimit në gjysmëfinale të “Europa League” dhe në Premier League me një vend të 7-të, që i dha vetëm kualifikimin për në Ligën e Konferencës së ardhshme, pasi prej kohësh ishte në garë për një vend në Champions League, West Ham është gati për një sesion merkatoje prej lideri.

Siç raporton “The Guardian”, skuadra e drejtuar nga David Moyes, që sapo ka blerë mbrojtësin maroken Nayef Aguerd nga Rennes, ka vënë në shënjestër Armando Brojën, talentin e ri shqiptar në pronësi të Chelsea, i kthyer nga një sezon mbresëlënës huazimi te Southampton.

I lindur në vitin 2001, Broja shënoi 6 gola në Premier League me “shenjtorët”, duke kontribuar shumë në mbijetesën e skuadrës së drejtuar nga Ralph Husenhuttl. Shqiptari përsëriti veten në nivele mjaft të mira pas vitit që kaloi te Vitesse, gjithashtu i huazuar nga Chelsea.

Broja është rritur në sektorin e të rinjve të bluve të Londrës që në moshën 9-vjeçare. West Ham ka gati një ofertë prej 30 milionë paund, diçka më pak se 40 milionë euro për sulmuesin e talentuar shqiptar.

Megjithatë, në garën për shërbimet e Brojës, West Ham do të duhet të përballet me konkurrencën e disa klubeve kryesore angleze, duke përfshirë Arsenalin. Po kështu, “ankandit” të shqiptarit i është bashkuar edhe Napoli, klub që e ka ndjekur lojtarin prej disa kohësh dhe e ka identifikuar atë ndër trashëgimtarët e mundshëm të Victor Osimhen, nëse nigeriani largohet nga Italia.

Pengesa e fundit, aspak margjinale, është vullneti i Chelsea, i cili mund të shkojë deri aty sa të kërkojë deri në 40 milionë paund për xhevahirin e tij. Fjala e fundit, megjithatë, do të jetë e Thomas Tuchel, i gatshëm të marrë parasysh edhe mundësinë e mbajtjes së Brojës në ekipin që drejton.

Pasi ta vlerësojë e testojë gjatë gjithë verës, trajneri gjerman mund t’i besojë atij rolin e trashëgimtarit të të larguarit Romelu Lukaku.