Menaxheri i ekipit të Barcelonës, Eric Abidal, zbuloi në një intervistë për “Sport” se interesimi i katalanasve për Matthijs de Ligt gjatë verës nuk ishte vetëm konkret, por pati edhe kontakte të vërteta midis palëve. Përpjekja e kampionëve të Spanjës për të shtuar në radhët e veta, pas Frenkie de Jong, një tjetër yll të Ajax në merkaton e verës ishte më shumë se një ide e thjeshtë. Siç pohon Abidal, i cili aktualisht është pjesë e strukturave ekzekutive të Barcelonës, ishte vetë De Ligt, ai që kundërshtoi destinacionin katalanas, duke zgjedhur Torinon dhe bardhezinjtë:
“De Ligt nuk donte të vinte. Ai më dha përshtypjen se ka ndryshuar vizionin e të parit të gjërave. Holandezi vinte kusht që të luante, patjetër të luante rregullisht. Mirëpo, këtu te Barcelona nuk e ka askush vendin të garantuar në formacion. Unë nuk e di nëse vërtet kishte dëshirë për të ardhur këtu. Mendoj se jo, ngaqë garanci për vendin në formacion nuk i jepnim dot, ndaj shkoi te Juve”.
Sipas ish-mbrojtësit francez, zgjedhja e mbrojtësit holandez të datëlindjes 1999 për të zgjedhur Juventusin u ndikua nga disa garanci për të luajtur atje, çka Barcelona nuk ia ofroi. Edhe në klubin e Juventusit, megjithatë, paraqitjet e De Ligt në këtë pikë të sezonit nuk kanë qenë fort bindëse. Nëse Giorgio Chiellini nuk do të pësonte dëmtim, vështirë të luante startues në qendër të mbrojtjes bardhezi, përkrah Bonucci.