Sa kohë do të duhet për të parë ndikimin e Ruben Amorim te Manchester United? Trajneri portugez, në prag të debutimit të tij në Premier League dhe në stolin e “Djajve të Kuq”, foli në një konferencë për shtyp, ku iu përgjigj edhe kësaj pyetjeje:

“E di që kur je te Manchester United duhet të fitosh ndeshjet, kështu që nuk do t’ju them që më duhet shumë kohë. Premier League është një kampionat fantastik, më i miri në botë, ndaj duhet të përmirësohemi shumë. Duhet t’i fitojmë ndeshjet dhe pastaj të fitojmë titujt”.

Për sa i përket merkatos, Amorim tha: “Duhet të punojmë së bashku dhe për ta bërë këtë, duhet të përmirësojmë procesin e rekrutimit. Të dhënat dhe profili i lojtarëve që duam duhet të analizohen të gjitha bashkë. Duhet të kem një qëndrim të fortë për këtë, sepse jam trajneri dhe e di se si duhet të luajmë.

Gjithçka është e përbashkët, jemi një ekip, por fjala e fundit duhet të jetë e trajnerit. Kjo, jo vetëm sepse është një e drejtë e imja, por sepse është përgjegjësia ime, duke qenë se në fund do të më kërkohet mua llogari për rezultatet”.

Sa i përket fillimit të kësaj eksperience të re si trajner, portugezi u shpreh kështu: “Duhet ta kuptoj kampionatin. Kur gjithçka është e përputhur dhe të gjithë janë në të njëjtën gjatësi vale, mund të blejmë dhe të shesim lojtarë. Nuk është çështje e fjalës së fundit, por kam një përgjegjësi të madhe kur zgjedhim lojtarët. Kjo sepse kështu duhet të bëhet. Jam trajneri, kështu që më takon mua t’i zgjedh lojtarët”.