Sytë janë nga ai, si referenca kryesore e sulmit kuqezi për sot dhe të ardhmen. Është 21 vjeç, luan me Chelsea, vjen nga një sezon (i kaluari) mbresëlënës në Premier League me Southampton, ku luajti i huazuar, ndaj nuk ka kush tjetër kredenciale më të mira në kampin kuqezi.
Fjala është për Armando Brojën, i cili ka dalë sot në konferencë për shtyp dhe ka folur në prag të dy sfidave përmbyllëse të edicionit në Ligën e Kombeve: transfertës me Irzaelin (24 shtator) dhe duelit me Islandën në “Arena Kombëtare” (27 shtator)”:
“Mendimi im është se këto ndeshje janë të rëndësishme dhe duhen 6 pikë. Trajneri e bën formacionin, siç e tha Laçi. Ai ka aplikuar në stërvitje disa skema për ta fituar ndeshjen. Inshallah fitojmë 3 pikët në Izrael. Më e rëndësishme është të marrim 3 pikët, jo loja.
Titullar? Nuk e di, do të shohim. I bën trajneri zgjedhjet. Nëse më aktivizon, do të jap maksimumin. Shpresojmë të dalim me 3 pikë nag transferta me Izraelin. E dijmë që do të jetë ndeshje e vështirë. Ky kundërshtar na mposhti edhe në Tiranë 2-1.
Na duhet fitore për objektivin dhe shpresojmë të marrim më të mirën. Për mua s’ka shumë presion se po luajmë për qej, për fitore. Kam luajtur qysh 3 vjeç futboll. Dua të ndihmoj kombëtaren.
Gjithmonë jam në formë. Po bëj stërvitje çdo ditë. Ne e dimë që është e vështirë të luash shumë te Chelsea, nuk është si te Southampton. Jam mirë fizikisht, po vazhdojmë të stërvitemi si skuadër. Vetëm fitorja na bën punë ndaj Izraelit”.