Boksieri meksikan Saul “Canelo” Alvarez fitoi duelin ndaj turkut Avni Yildirim, i cili u tërhoq në raundin e tretë. Kjo sfidë ishte e vlefshme për titujt kampionë bote të peshës super të mesme (WBA e WBC).
Përballja u zhvillua në Miami të Florida (Amerikë), ku meksikani mbrojti pa shumë mund titujt kampionë. Duel që u dominua nga Canelo Alvarez, 55 fitore, 1 humbje e 2 duele barazim. Ndërsa për Yildirim kjo ishte humbja e tretë në karrierë (ka edhe 21 fitore).
Sfida nuk pati shumë histori, teksa forca e grushteve të Alvarez detyroi rivalin turk të tërhiqej në raundin e tretë, ndërkohë që dueli u ndoq nga 12 mijë fansa të pranishëm në “Miami Dolphins Stadium”.
Pas kësaj sfide është vendosur që boksieri meksikan të duelojë ndaj britanikut Billy Joe Saunders, që mban titullin e kategorisë WBO në peshën super të mesme. Kjo sfidë, që do të unifikojë titujt, do të zhvillohet në maj të këtij viti.
ICYMI: Canelo Alvarez took care of business tonight. pic.twitter.com/xFIU2Q9URk
— Yahoo Sportsbook (@YahooSportsbook) February 28, 2021
