Kampionati Shqiptar

Çfarë gafe Teqja, Kukësi falënderon dhe fundos Skënderbeun!

U luajt në Kamzë ndeshja hapëse e javës së 16-të të Superiores, mes Kukësit dhe Skënderbeut. Si gjithmonë migrues në këtë kampionat, nënkampionët verilindorë i kanë pritur aty kampionët në fuqi, në një sfidë shumë delikate për të dyja palët.

Është një përballje që i ka dhënë tonin futbollit shqiptar vitet e fundit, ndaj Kukësi priste shumë tifozë në këtë stadium, duke ditur se qindra familje kuksiane janë shpërngulur në Kamëz. Kështu ka ndodhur, sfidën e zjarrtë e kanë ndjekur mjaft spektatorë.

Triumfoi Kukësi 1-0, me një gol të shënuar me 11-metërsh në minutën e 54-t nga William Cordeiro, i cili shfrytëzoi më së miri dhuratën e Skënderbeut. Kjo për faktin se portieri Aldo Teqja tentoi një driblim në zonë, Et’hemi i rrëmbeu topin dhe më pas u pengua në zonë nga portieri i pafat, i cili vendosi fatet e një sfide mjaft të ekuilibruar.

Pjesa e parë pati ritëm, por edhe gabime nga të dyja palët, ndërkohë që edhe fusha jo e mirë pengonte lojën e rrjedhshme. Pak raste të pastra për shënim, edhe pse Kukësi pati momente jashtëzakonisht të favorshme, sërish për një gabim të portierit Teqja në një moment, por Dzaria gaboi i vetëm me portierin. Ndikonin edhe problemet e dy ekipeve, sepse te Kukësi ishte në stol Reginaldo, ndërsa Skënderbeu ka kohë që nuk po arrin të zgjidhë hallet e sulmit, ku nëse nuk shënon Dejvi Bregu nuk e bën askush tjetër.

Në minutën e 54-t erdhi episodi vendimtar, me Teqjen që gaboi totalisht dhe aq u desh që të vendosej sfida, sepse pas golit të shënuar me qetësi nga Cordeiro Skënderbeu nuk pati forcë për të krijuar ndonjë rast vërtet të pastër për shënim.

Fitore e madhe për Kukësin, që barazohet me Skënderbeun në renditje, ndërsa Partizani është +4, por nesër luan në Durrës. Nëse fiton Partizani, krijohet shkëputja e parë e madhe e sezonit, por javën e ardhshme luhet Partizani-Kukësi.

SUPERIORE / JAVA 16

Kukësi – Skënderbeu       1-0

Shënues: Cordeiro 54’ pen.

KUKËSI: Frashëri, Maliqi, Krasniqi, Shameti, Cuculi, Limaj (Shodra 77′), Dzaria, William Cordeiro (Rrumbullaku 90′), Çyrbja, Et’hemi, Spehar (Reginaldo 67′). Trajner: Armando Cungu.

SKËNDERBEU: Teqja, Vangjeli, Sambou, Aliti, Abazi, Muzaka (Guindo 74′), Dita, Demte (Guedj 80′), Fili, Bregu, Oto John (Gripshi 71′). Trajner: Orges Shehi.

Kartonë të verdhë: Cordeiro 14’, Spehar 66′ / Dita 34’

Gjyqtarë: Juxhin Xhaja, Denis Rexha, Arbër Zalla, Emirion Sino.

Standings provided by Sofascore LiveScore

Telesport është krenar që bashkëpunon me Krowd9, një aplikacion fantastik i futbollit për shqiptarët! Shkarkojeni > KETU për video me përmbledhje ndeshjesh, njoftime të menjëhershme për golat dhe të gjitha lajmet e Telesport! Krowd9 është i përdorshëm në shqip, italisht dhe anglisht.

Më shumë nga Kampionati Shqiptar