PERFEKSIONISTI Pep Guardiola nuk ka qenë plotësisht i kënaqur me lojtarët e tij, pavarësisht fitores së thellë të marrë nga City në derbin e së dielës.
Lojtarët e Guardiola-s mposhtën rivalët e tyre të përjetshëm me rezultatin e thellë 6-3, por spanjolli ende dëshiron më shumë nga ata.
Pavarësisht se ka dominuar Manchester United në çdo repart, trajneri spanjoll i ka kërkuar skuadrës së tij që të mos jetë aq e pakujdesshme kur ka zotërimin e topit.
Dhe përpara ndeshjes së City-t në Champions League kundër Kopenhagen, ai sfidoi lojtarët e tij që ta ndreqin këtë gabim. “Jo vetëm të dielën, kundër Wolves ka qenë njësoj.
“Gjëja më e vështirë në futboll është të bësh gjërat e lehta dhe këto gjëra të lehta ne nuk po i bëjmë mirë në disa reparte. Gabojmë pasimet e thjeshta.
“Dhe në faza të rëndësishme dhe në ndeshje të rëndësishme, do të jetë një problem. Është e lehtë për ta zgjidhur atë, sepse lojtarët janë mjaft të aftë për ta zgjidhur atë”.
Pakënaqësia e Guardiola-s vjen pavarësisht se pa skuadrën e tij të shënonte tre ose më shumë gola për të shtatën herë në këtë kampionat.
City gjithashtu kishte pothuajse dyfishin e tentativave (22-12) krahasuar me rivalët e tyre dhe realizoi afro 500 pasime.