Hernan Crespo, ish-sulmuesi i Interit dhe Milanit, foli për derbin e kreut të Serie A gjatë një interviste me “Gazzetta dello Sport”.
E keni parë Interin, çfarë po ndodh me të?
Një ekip që po shënon me lehtësi mbresëlënëse. Kjo do të thotë që loja është e rrjedhshme, se manovra ka piketa precize dhe se të gjithë në fushë dinë çfarë bëjnë.
Ta fillojmë nga Lukaku-Lautaro…
Në Itali nuk ka një duet tjetër kaq produktiv. Edhe në Europë, kur mendoj për dyshe sulmuese, nuk gjej krahasim. Lukaku dhe Lautaro plotësojnë njëri-tjetrin; të gjithë tek Interi po mbështesin veprimet e tyre.
A ka ndryshuar mënyra e tyre e të luajturit?
Fillimisht shfrytëzonin zonës afër pikës së penalltisë, tani kuptohen lehtësisht me njëri-tjetrin edhe në fushë të hapur. Kjo dëshmon se koha dhe njohuria për pikat e forta dhe të dobëta të njëri-tjetrit vetëm e rrit vlerën e këtij dueti.
Çfarë të bën përshtypje te të dy?
Fuqia e Lukakut, pa dyshim. Kur nis inkursion, është si një tren, tërheq me vete shokët e skuadrës dhe kundërshtarët. Edhe nga këmbët, siç tregohet nga “brisku” i golit të tretë kundër Milanit, nuk është aspak keq.
Po Lautaro Martinez…
Unë e njoh atë prej një kohe të gjatë. Këtë verë e këshillova që të mos pranojë ofertën e Barcelonës dhe të mos lëvizë nga Interi. Dhe në fund të fundit kisha të drejtë. Në zonë ai është vdekjeprurës, lëvizjet e tij kanë synim gjithmonë portën, golin. Edhe me kokë është i fortë, kërcen më lart se mbrojtësit më të gjatë se ai.
Të gjithë tek Interi po e mbështesin këtë duet…
Ju mund të shihni punën e trajnerit. Conte ishte shumë i mirë në formësimin e ekipit, sipas parimeve të tij taktike, teknike dhe të karakterit. Interi ka një identitet shumë specifik, mbron me tre, sulmon nga krahët, lëviz e gjithë skuadra së bashku. Nga ana tjetër, numri i golave të shënuar e thotë këtë. Edhe loja është aty.
Përveç aspektit teknik, ekziston edhe faktori njerëzor te një trajner. Si të duket Conte?
Le të shohim se si Conte ka rikuperuar lojtarë si Eriksen ose Perisic. Shumë i konsideruan ata jashtë projektit, por Conte ishte një mjeshtër i psikologjisë për kthimin e tyre në rrugën e duhur. Ky është nga ato detaje, kur ne mund të shohim rëndësinë e një trajneri. Ai kishte durim, i bëri ata të mësonin rregullat e dhomës së zhveshjes dhe i priti siç do të bënte një familjar i mirë. Dhe tani Interi ka dy lojtarë klasi më shumë!
