Samu Castillejo denoncoi se shtëpia e tij në Valencia ishte grabitur teksa ai po luante ndeshjen e parë të La Liga-s në “Mestalla” kundër Girona, në të cilën ishte startues.
Ish-sulmuesi i Milanit postoi një video në rrjetet sociale, në të cilën shihen dollapët dhe sirtarët e kthyer përmbys, si dhe rrobat e hedhura në dysheme. Ai shprehu keqardhjen se hajdutët i kishin marrë “gjëra materiale, personale dhe sentimentale”.
Lojtari i lindur në Barcelonë dhe i rritur në Malaga nënshkroi këtë verë për Valencia, pas ndërprerjes së kontratës që e lidhte me Milanin deri në fund të këtij sezoni.
Ai është “viktima” e radhës e grabitësve, që po bëjnë namin në shtëpitë e futbollistëve, ku janë të sigurt se nuk dalin duarbosh.