Duka para miqësores së luksit: Këtu brohoritet edhe Italia, sonte të gjithë do ta këndojnë himnin…

16 Nëntor 2022
11:42
Alfred Lleshi

“Do të jetë një miqësore luksi, ne do të luajmë kundër një ekipi të fortë, që ka shumë tifozë në Shqipëri. Pas Italisë, shumica e tifozëve në Shqipëri mbështesin kombëtaren italiane. Do të ketë një entuziazëm të madh, nuk kemi pasur kurrë një kërkesë kaq të madhe për bileta”.

Këto janë fjalët dhe mendimet e numrit një të futbollit shqiptar, presidentit të FSHF-së Armand Duka, i cili foli ekskluzivisht për “TuttoMercatoWeb.com” ditën e Shqipëri-Itali, një ndeshje miqësore që do të zhvillohet në stadiumin “Air Albania”, i njohur si “Arena Kombëtare”, dizajnuar nga arkitekti italian Marco Casamonti.

“Më vjen keq që nuk mund ta shoh Italinë në Kupën e Botës, por, – vijon Duka, – është bukur t’i presim axurrët në Tiranë. Këtu në Shqipëri është një festë e vërtetë, Italia është kombëtarja e dytë për të cilën bëjnë tifo shumë qytetarë të Tiranës. Kjo është arsyeja pse sonte, edhe pse larg, axurrët mund ta gjejnë veten me gjithë stadiumin duke kënduar himnin e tyre”.

Edhe ju ishit afër kualifikimit në Kupën e Botës…
Ne përfunduam të tretët në grup me Anglinë dhe Poloninë, humbëm ndeshjen e fundit. Ishim të pafat edhe në ndeshjen vendimtare, u gjendëm pa tre lojtarët kryesorë ditën e ndeshjes ndaj Polonisë, sepse rezultuan pozitivë për Covid. Pësuam një gol të vonë, por ky klasifikim ishte i mirë për ne. Kurrë nuk e kemi arritur vendin e tretë në një grup kualifikues për Kupën e Botës.

Rezultatet e Shqipërisë janë vazhdimisht në rritje…
Në vitin 2021 fituam grupin e Ligës C të Ligës së Kombeve dhe kaluam në Ligën B, ku nuk dolëm mirë, duke marrë vetëm dy pikë në katër ndeshje: dy barazime kundër Islandës, dy disfata kundër Izraelit (Rusia u pezullua nga UEFA). Tani presim kualifikimin në ‘Euro 2024’, me Poloninë dhe Çekinë si kundërshtarë më të akredituar. Do të përpiqemi të luftojmë për vendin e dytë. Do të nisemi për në Poloni në mars, do të përpiqemi të bëjmë më të mirën menjëherë.

Reja është me ju prej më shumë se tri vitesh, si e gjykoni punën e tij?
Reja si trajner i Shqipërisë e udhëhoqi kombëtaren tonë në katër gara. Ai e mori ekipin në kualifikueset e Kampionatit të fundit Evropian, ku doli mirë, vetëm se humbi betejën në fund, për një gol të minutës së fundit në Turqi. Më pas fitoi grupin e Ligës C të Ligës së Kombeve, duke marrë kualifikimin në Ligën B. Grumbulloi 18 pikë në kualifikueset e Botërorit të Katarit, duke rezultuar në vendin e tretë. Po kështu mori vendin e tretë në grupin e Ligës B të Ligës së Kombeve. Përgjithësisht për mua ai ka punuar shumë mirë, ka rinovuar pak ekipin, ka ndërtuar një skuadër pak më të madhe.

Kontrata e tij tani po skadon. A do të jetë sërish trajneri juaj?
Ne e lamë Rejën të qetë për këto dy ndeshje, kundër Italisë dhe Armenisë, pa bërë asnjë diskutim. Pas kësaj do të ulemi rreth një tavoline dhe do të diskutojmë.

A nuk duhet të vazhdojë Reja, apo keni në mendje ndonjë trajner tjetër italian?
Ndoshta po, ndoshta jo. Nëse nuk është Reja, duhet të analizojmë… Nuk kemi kandidatë për momentin. Italianët janë më të preferuar sepse kemi gjysmën e ekipit që luan në Itali dhe të gjithë e flasin gjuhën. Pastaj e juaja është një shkollë e madhe futbolli, sigurisht që këto janë themele të rëndësishme.

Shumë lojtarë ‘italianë’ janë në kombëtaren tuaj…
Berisha është kapiteni ynë, pastaj Djimsiti nga Atalanta dhe Ismajli nga Empoli, dy shtyllat e mbrojtjes sonë. Asllani luan në një klub më të rëndësishëm dhe të njohur si Interi. Më pas në kryeqytet është Kumbulla te Roma dhe Hysaj te Lazio. Mos harrojmë Bajramin, ende tek Empoli; ndoshta është lojtari ynë që ka bërë më të mirën në këtë pjesë të parë të Serie A.

Gjithashtu sepse Asllani dhe Kumbulla, lojtarët tuaj të rinj më premtues, nuk po luajnë shumë…
Është e vërtetë… Nuk e di nëse pranimi i pankinës është mënyra e duhur për ta. Për mendimin tim është më mirë që ata të shkojnë në klube ku mund të luajnë 90 minuta. Ata duhet të luajnë, të gjithë kanë nevojë për aktivizim, por sidomos këta që janë ende të rinj….

E njëjta gjë po ndodh edhe me Armando Brojën te Chelsea, ylli juaj i ri…
Më mirë kur luante në Southampton, ai ishte pothuajse gjithmonë në formacionin titullar. Tani luan 15-20 minuta çdo ndeshje dhe nuk është njësoj si të luajë 90.

Ndoshta për të gjetur më shumë hapësirë ​​mund të zbarkojë në Itali, ku ka disa klube që e ndjekin…
Unë jam i interesuar që ai të luajë dhe të bëjë mirë, nuk më intereson se ku. Pastaj, sigurisht, aq më mirë nëse luan për Milanin. Unë jam edhe pak tifoz i Milanit…

Sonte, çfarë klime prisni?
Pres të njëjtën klimë si ndeshjen e fundit të zhvilluar në Genoa (viti 2014), me të gjithë tifozët shqiptarë që këndojnë edhe himnin italian.

Lajme të tjera

Lajmet e fundit