Trajneri i kombëtares së Kosovës, Bernard Challandes, ka bërë publike listën e lojtarëve që ka ftuar për dy ndeshjet e këtij muaji. Të gjithë vijnë nga jashtë, me përjashtim të të vetmit, Visar Bekaj, që aktivizohet me Prishtinën. Kujtojmë se përfaqësuesja e “Dardanëve” do të luajë ndeshje miqësore më 21 mars, kundër Danimarkës, në Prishtinë, ndërsa katër ditë më pas do ta bëjë “sefte” me eliminatoret e “Euro 2020”, duke sfiduar Bullgarinë, më 25 mars, në Sofje.
Për herë të parë nën urdhrat e Challandes do të jetë Florent Hasani, deri më tani pjesë e Kosova U-21, që luan në Hungari me Diosgyori. Të rikthyerit janë Bersant Celina dhe Bernard Berisha. Grumbullimi i verdhekaltërve do të nisë të hënën e javës që vjen. Kujtojmë se Kosova është në grupin A të kësaj fushate eliminatoresh, bashkë me Bullgarinë, Republikën Çeke, Anglinë dhe Malin e Zi.
Një “grup ferri” për ta pretenduar së këndejmi kualifikimin, por ka edhe “dritaren” tjetër, përmes gjysmëfinales së Ligës së Kombeve, që do ta diskutojë në përplasjen direkte me Maqedoninë.