Largimi i Ernesto Valverdes nga skuadra e Barcelonës është i sigurt. Ekipi katalanas ka njoftuar teknikun dhe menaxherët e tij se nuk do të jetë më në krye të skuadrës, por numri një i stolit nuk ka ndërmend të tërhiqet.
U mendua se Barcelona do dilte me komunikatë zyrtare për shkarkimin e teknikut, por gjasat janë që rezistenca të jetë e madhe. Ai nuk pranon të heqë dorë nga posti i trajnerit pa dëmshpërblimin e tij.
Drejtuesit nuk e duan, tekniku nuk largohet dhe gjithçka ka mbetur në ajër. Mediet pranë Barcelonës si Sport shkruajnë se klubi e ka hequr spanjollin dhe do ta zyrtarizojë, por një njoftim i tillë nuk po publikohet.
E ardhmja e teknikut, ose më saktë, mënyra e ndarjes mes palëve do të mbetet për t’u mësuar nesër, pasi deri në këto momente nuk ka asnjë informacion të ri në lidhje me shkarkimin e Valverdes dhe emërimin e Quique Setién.