E vjedhin pas garës, kampioni i botës ndjek hajdutët me monopat rrugëve të Barcelonës

24 Maj 2022
9:30
Gentian Spiri

Një ngjarje e shëmtuar i ka ndodhur pilotit gjerman Sebastian Vettel, 4 herë kampion bote në Formula 1. Ditën e hënë, 24 orë pas garës së Spanjës, piloti i Aston Martin ndodhej në hotel, në Barcelonë. Ai kishte harruar dritaren e makinës së tij të hapur dhe hajdutët kanë përfituar për t’i vjedhur një çantë shpine që kishte me vete.

Në çantë ndodheshin dokumentat personale dhe një AirPod. Pikërisht kufjet e AirPod i dhanë mundësi Sebastian të zbulojë se ku ndodheshin keqbërësit. Me ndihmën e iPhone, ai arriti të monitorojë vendndodhjen e tyre duke përdorur Gps. Më pas, Vettel nisi t’i ndjekë hajdutët, duke përdorur monopatinën e tij elektrike.

Ai i ndoqi deri në zonën e El Raval të Barcelonës, ku piloti gjerman gjeti vetëm një pjesë të sendeve të vjedhura. Nuk gjeti çantën me dokumente, por vetëm kufjet e hedhura nga hajdutët, që duket se kuptuan se mund t’i gjenin përmes tyre. Piloti ka denoncuar ngjarjen me shpresën ëq të gjejë dokumentet dhe të niset për Montekarlo.

Lajme të tjera

Lajmet e fundit