Kai Havertz beson se Declan Rice do të bëhet një lojtar i madh për Arsenal-in.

Gjermani i ka thurur elozhe mesfushorit anglez dhe shpreson që ai të ketë një karrierë legjendare me Topçinjtë.

Arsenal nuk po kalon një moment të mirë forme, me vetëm një fitore të marrë në pesë ndeshjet e fundit të luajtura në të gjitha kompeticionet.

Declan Rice është një nga lojtarët e kritikuar për ecurinë negative të ekipit.

Anglezi u ndëshkua me karton të kuq në një ndeshje të kampionatit kundër Brighton-it në fillim të sezonit, me kundërshtarët që arritën të merrnin një barazim 1-1 në Emirates.

Kai Havertz, megjithatë, beson se Rice mbetet një nga lojtarët më të rëndësishëm të ekipit.

“Declan është shumë i rëndësishëm për ne”, ka thënë Havertz. “Në çdo aspekt të ndeshjes, në fazën mbrojtëse dhe atë sulmuese. Ai nuk tërhiqet kurrë mbrapa, nuk fshihet, dhe flet shumë.

“Është i pabesueshëm dhe shumë i ri. Shpresoj që të bëhet një legjendë e Arsenal-it”, ka thënë Havertz për Premier League Productions.