Turi i parë kualifikues i Europa League ka nisur që ditën e martë me tre ndeshje ku ra në sy fitorja e Rangers 4-0 jashtë fushe ndaj St Joseph's, por edhe suksesi i CSKA Sofie me OFK Titograd po me të njëjtin rezultat. Gjithashtu, sukses edhe për Hajduk Split në Maltë.
Ndërkohë, ditën e mërkurë u luajt Jeunesse Esch me Tobol, e përfunduar 0-0. Por, sot është "pjata e fortë" me plot 43 ndeshje, nga të cilat në katër të tilla zbresin ekipet shqiptare në fushë.
Pasditja e ditës së enjte do të hapet me sfidën e Shkupit, në transfertën armene ndaj Pyunik, ndërsa do të vazhdojë më pas me Ventspils-Teuta dhe Laçi-Hapoel Beer Sheva. Kukësi do të zbresë në fushë në orën 19:00 ndaj Debrecen, në Hungari.
Por, sigurisht, që në këtë pasdite ka vend edhe për gjashtë skuadra debutuese në kupat e Europës, mes kurioziteteve dhe personazheve.
Të ndalemi te Sabail FK. Ndoshta, hera e parë që e dëgjoni. E renditur në vend të tretë në sezonin e shkuar në Azerbajxhan, skuadra në fjalë ka vetëm 3 vite që është themeluar, por në përbërjen e saj ka një emër që ka fituar 1 Champions League dhe 4 kampionate, mes Francës dhe Anglisë, duke veshur edhe fanella si ajo e Chelseat, Milanit, Lyon dhe Panathinaikos.
Essien u transferua në mars të këtij viti në Baku, te skuadra në fjalë, tesa 36-vjeçari veç fushës është edhe trajner i ekipit të moshave, pasi në të ardhmen dëshiron të marrë stolin.
Surpriza tjetër quhet Academy Pandev, që fitoi Kupën e Maqedonisë sezonin e shkuar. Pjesëmarrja e parë në Europë për klubin e themeluar nga ish-interisti Pandev, që pas Tripletës së Famshme, vendosi që të ndërtonte një klub futbolli duke i vendosur mbiemrin e tij dhe duke investuar thuajse 2 mln euro në strukturat e klubit dhe Akademinë. Jo më kot, përbërja është 99% me futbollistë të Maqedonisë së Veriut, me përjashtim të atij 1%: portieri serb, Cubrakovic (34 vjeç).
Fotbal Club Petrocub Hîncești... Një klub futbolli moldav që ka mbi 30 vjet që është themeluar, por që për të parën herë e sheh vetën në Europë, teksa vjen nga një fshat me vetëm 6 mijë banorë, edhe pse ndeshjet i luan në qytetin e Hinçeshtit.
Qëndrojmë në Moldavi, aty CSF Speranța Nisporeni është surpriza e rradhës në Europë. Një qytet me 12 mijë banorë, 70 km larg Kishinaut. Në vitin 2010 ndryshoi emrin, pasi më parë e kishte Clubul Sportiv de Fotbal Speranţa Nisporeni… Shumë i gjatë, vërtet!
E mbani mend ekipin me të cilin Partizani zhvilloi miqësoren e parë në Slloveni? NK Mura! Dikur quhej Nogometno Drustvo Mura 05 në qytetin e Murska Sobotas, por në vitin 2005 falimentoi dhe në vitin 2013 mori një tjetër emër…
Programi i ndeshjeve të sotme