Këtë janar Cesc Fabregas u transferua në Francë, duke firmosur për Monaco-n, pasi ndërpreu marrëdhëniet me Chelsea-n, aty ku kishte kohë që po luante gjithnjë e më pak dhe ishte kthyer në barrë, me vetëm një ndeshje titullar në Premier League në pjesën e parë të sezonit.
Fillimi ishte i vështirë, Monaco nuk bëri asnjë ndryshim pozitiv me Thierry Henry dhe trajneri i largua, ndërsa është kthyer Leonardo Jardim, duke bërë që situata të përmirësohet me shpejtësi.
Edhe Fabregas tashmë është i qetë dhe sheh me optimizëm nga e ardhshme: "Monaco duhet të luajë në Champions league, ky do të jetë synimi vitin e ardhshëm. Ndoshta duhet të përforcohemi, por është punë e klubit, edhe pse është e qartë që për të garuar për 3 vendet e para duhet një ekip më cilësor".
Pjesa më interesante e konferencës për shtyp të spanjollit ishte e shkuara dhe raporti i tij me trajnerin Maurizio Sarri:"Isha te Chelsea, mund të rinovoja, por një trajner i ri erdhi dhe mori me vete një lojtar që e konsideronte si djalin e tij. E kuptova që nuk do të luaja shumë ndeshje titullar, pak rëndësi kishte sa mirë luaja në krahasim me të tjerët. Duke qenë se dua të luaj rregullisht, vendosa të largohesha".