Skuadra e Teutës është rikthyer te fitorja pas dy humbjeve dhe një barazimi të regjistruar në tre ndeshjet e fundit, pasi ka mundur sot në Durrës skuadrën e Kastriotit me rezultatin minimal 1-0, falë një autogoli të krutanëve në minutën e 23’.
Pas javës së 26-të, në kutëon e 43 pikëve, skuadra e Teutës renditet në vend të tretë të klasifikimit me vetëm 2 pikë distancë nga Kukësi I vendit të dytë, por kampionati nuk është bileta e vetme e durrësakëve për në Europë.
Teuta është gjithashtu në lojë për një vend në gjysmëfinalen e Kupës së Shqipërisë, që do të vendoset të mërkurën kur të ndeshet me Kukësin, pas barazimit 2-2 në takipin e parë. Një sfidë në të dyja kampet për durrsakët që shpallet edhe nga mbrojtësi i Teutës, Erlis Frashëri.
“Ishte një fitore shumë e vuajtur. Tani shpresojmë që ky ngërç të kalojë. Që tani nisim të përgatitemi për ndeshjen e të mërkurës ndaj Kukësit. Normalisht ne do të bëjmë më të mirën.Teuta synon Kupat e Europës dhe ne do të bëjmë maksimumin për të arritur këtë objektiv”, komentoi futbollisti i Teutës, Erlis Frashëri.
“Shpresoj që të mërkurën të kualifikohemi për në fazën tjetër të Kupës së Shqipërisë. Besimi është i madh. Ketë ndeshje e kishim të vështirë sepse vinim pas tre rezultateve negative, por arritëm të merrnim 3 pikët. Urojmë tani të mos ndalemi më”, u shpreh mbrojtësi i Teutës.
“Sinqerisht ka patur ndeshje që nuk kam qenë në nivelin e duhur dhe nuk jam i kënaqur me veten. Besoj se këtë ndeshje kam shfaqur një nivel më të lartë. Këtu te Teuta jam përshtatur direkt me grupin, sapo kam mbërritur”, deklaroi ndër të tjera Frashëri.