Coronavirusi ka pushtuar Italinë e Veriut ku janë konfirmuar mbi 200 të prekur në rajonet e Lombardisë dhe Venetos. Ky virus i tmerrshëm ka ndikuar edhe në futboll, teksa gjysma e sfidave të javës së 25-të në Serie A u anuluan.

Në pikëpyetje është java e ardhshme, pasi mbetet ende për t’u parë nëse do të luhen të gjitha takimet, apo kampionati do të pezullohet për momentin. Mëngjesin e sotëm është përhapur lajmi se kryendeshja Juventus-Inter mund të luhet pa tifozë.

Të njëjtën zgjidhje mund të ketë edhe sfida tjetër mes Milanit dhe Genoas. Ndryshe nga Inter-Sampdoria që u anulua dhe nuk u luajt mbrëmjen e kaluar, ndeshja mes kuqezinjve dhe Genoas mund të luhet, por me dyer të mbyllura, pra pa tifozë. Sipas medieve italiane, deri më tani kjo duket se është zgjidhja.