Edhe pak ditë për të vendosur se kujt do t’i shkojë tituli i kampionatit italian 2021-22. Milani dhe Interi do të luajnë përkatësisht kundër Sassuolos dhe Sampdorias. Kuqezinjve iu duhet vetëm një pikë, por shpresa e zikaltërve është ende atje. Këtë e vërtetojnë fjalët e ish-portierit Julio Cesar, i cili ka thënë për “Goal”:
“Ne e dimë se Milani ka një mundësi të madhe, por do të jetë e vështirë për të dyja skuadrat deri në fund. Ata e dinë se nuk mund të humbasin pikë tani. Si një tifoz zikaltër, shpresoj që Interi të shtojë titullin e dytë radhazi. Do të ishte vërtet diçka fantastike”.
Kapitulli i portierëve me Handanovic, Onanën, por edhe një pasazh për atë që ndodhi me Radu, në gabimin e rumunit ndaj Bologna, që mund të rezultojë fatal për titullin: “Onana është ende tek Ajax, kështu që nuk do të flas për të derisa të vijë.
Handanovic bëri historinë e klubit, është kapiteni dhe më zëvendësoi mua tek Interi, duke bërë gjëra të mëdha. Ai është një portier i jashtëzakonshëm. Fatkeqësisht, Radu e bëri atë gabim në Bologna.
Ai është i ri, por nëse luan tek Interi, është sepse e meriton të jetë aty. Duhet të kenë besim tek ai dhe të vazhdojë të luajë, sepse vetëm kështu do të bëhet më i fortë se më parë. Çdo gabim të lejon të përmirësohesh. E dimë që ka gabuar në një moment të rëndësishëm në Serie A.
I gjithë kampionati e ka sjellë Interin në këtë pikë, ndaj tifozët dhe klubi nuk duhet të fajësojnë një portier. Kështu është futbolli, kërkohen heronj dhe zuzarë, fatkeqësisht kështu është gjithmonë në sport”.