Giovanni Galeone është gjithmonë i drejtpërdrejtë kur flet për futboll. Si një mjeshtër që ka stërvitur shumë skuadra dhe që ka nxjerrë nxënës të tij, mes tyre Max Allegri, flet për “La Stampa” për punën e Gasperinit, për Allegrin dhe sidomos Sarrin te Juventusi.
Atalanta e ka befasuar, sigurisht! “Mund të citoja Klopp, i cili kreu të njëjtin operacion në Gjermani dhe më pas në Angli. Por Gasperini e bëri atë duke rishikuar futbollin italian dhe duke e korrigjuar në aspektin ofensiv! Gjithmonë përpara, gjithnjë me shpejtësi. Presing asfiksues dhe dalje të menjëhershme”.
“Atalanta shënoi 98 gola: dhe vetëm në dy nga 38 ndeshjet nuk gjeti rrjetën. Këto janë numrat që peshojnë në futboll. Jo zotërimi i topit”.
“Allegri? Shpesh flas me të dhe ai ka besim tek unë. Pikërisht për këtë arsye nuk do t’ju rendis ekipet që ka refuzuar: para së gjithash për korrektësi, por edhe për të më kursyer një dhimbje koke”.
“Allegri te Inter? Le të themi se nëse Allegri do të arrinte të fitonte me Interin ai do të ishte i pari që do të plotësonte triptikun me Juventus dhe Milanin. Të themi gjithashtu se kurrë në jetën time nuk kam parë një goditje si ajo që Conte i dha klubit të tij! Pas 200 milion euro merkato…”.
Në fund, shigjetime ndaj Sarrit… “Me të gjithë këta numra, dhe të gjithë njerëzit që para mikrofonit thonë futbolli im… Më vjen të qesh! Po cili futboll i yti? A keni dëgjuar ndonjëherë një mjeshtër të vërtetë si Liedholm të thotë futbolli im? Pastaj numrat, përqindja e posedimit të topit. Kam dëgjuar Sarri të pretendojë 72 përqind një mbrëmje. Por problemi më duket se janë 28 pjesët e mbetura në të cilat të tjerët kanë topin: kaq pak, por mjaftoi që Juventus të pësojë 43 gola, diçka që nuk kishte ndodhur që prej luftës mes Romës dhe Kartagjenës…”.