Mësohen dy çiftet gjysmëfinaliste të Kupës së Shqipërisë. Shorti i hedhur sot në ambientet e stadiumit “Air Albania” ka vënë përballë Kukësin me Teutën dhe Tiranën me Bylisin. Dy përballje emocionuese, në kërkim të finales dhe fitimit të trofeut të dytë kombëtar për nga rëndësia, i cili shërben edhe për të luajtur në Kupat e Europës. Gjysmëfinalet e para do të luhen më 2 korrik, ndërsa ato të kthimit më 15 korrik. Kukësi dhe Tirana janë pritës në sfidat e para. Finalja është planifikuar më 2 gusht.
Kujtojmë se fituesi në fuqi i Kupës së Shqipërisë është Kukësi, që finalen e vitit të kaluar mposhti Tiranën 2-1. Skuadra që e ka fituar më së shumti këtë trofe është ajo bardheblu, 16 herë, e ndjekur nga Partizani me 15 herë dhe Dinamo me 13 herë. Nga gjysmëfinalistët e tjerë të edicionit aktual, Kukësi e ka fituar dy herë kompeticionin në fjalë (2016, 2019), Teuta tri herë (1995, 2000, 2005), ndërsa Bylisi asnjë herë. Mallakstriotët kanë qenë vetëm një herë finalistë, por janë mposhtur nga Laçi.