Ish-kampioni i dyfishtë i botës në artet marciale mikse, Daniel Cormier, ka konfirmuar se nëse nuk do të duelojë deri në fund të verës, ai do të tërhiqet nga sporti.

41-vjeçari pritet të duelojë ndaj Stipe Miocic, kampionit të botës në peshën e rëndë këtë verë. Gjithsesi, coronavirus ka lënë pezull të gjitha aktivitetet dhe kjo sfidë e tretë mes dy sportistëve mund të shtyhet për në dimër.

“Ne po synojmë të duelojmë në verë, ndoshta deri në fund të verës. Kjo do të ndodhë nëse vendi ynë arrin të sigurojë organizimin e eventeve, pasi coronavirus ka pezulluar gjithçka”, tha Cormier.

Daniel Cormier

“Nëse kjo situatë shkon më gjatë, përtej verës, nuk besoj se do të kthehem më në kafaz. Nuk ka asnjë shans të dueloj në dimër, pasi nuk kam më kohë. Dua që kjo sfidë të ndodhë në verë, në të kundërt lamtumirë”, tha Cormier.

Daniel Cormier ka mbajtur titujt kampionë bote në peshën “light heavyweight” dhe peshën e rëndë.