Besnik Kapllanaj, presidenti i Bylisit, ka kontestuar gjykimin e ndeshjes së djeshme me Kukësin, që të tijtë e humbën 1-0, falë një penalltie. Duke folur për emisionin “Fair Play”, numri një i klubit mallakastriot nënvizoi mes të tjerash: “Gjyqtari u bë protagonist, fillimisht duke akorduar një penallti të paqenë kundër ekipit tonë në pjesën e parë. Në pjesën e dytë, gjyqtari na mohoi një penallti të pastër. Është hera e dytë që gjyqtari Andi Koçi bëhet protagonist, pasi edhe në fazën e dytë, kundër Kukësit, na ka mohuar një penallti të pastër.
Andi Koçit i është hequr stema e FIFA-s me “ceremoni”, por ky gjyqtar nuk duhet të gjykojë më në Superligë. Unë do t’iu drejtohem organeve kompetente për këtë gjë. Ne kishim 4 mungesa zyrtare, Ntepe, Mozzone, Murataj dhe Bajramaj, por skuadra luajti mirë. Bylis vuajti pasojat e Kukësit në ndeshjen me Laçin.
Kriza financiare? Probleme të tilla ka gjithmonë në Shqipëri, por deri tani ekipi i Bylisit i ka zgjidhur disi këto probleme. Paga e luftës nga FSHF ishte një ndihmesë e vogël në ato 2 muaj që nuk u luajt futboll. Kupa e Shqipërisë? Kemi eleminuar Skënderbeun me meritë, tani presim Tiranën, ekipin më të mirë për momentin në Superligë. Janë dy ndeshje, besoj se do ta kalojmë me sukses edhe Tiranën”.