Kategoria e Parë

Kategoria e Parë, Tirana shkërmoq Pogradecin, vulos kreun e renditjes në Grupin B

Tirana nuk e ka diskutuar Pogradecin duke fituar ndeshjen me rezultatin e thellë 6-0. Tripleta e Sentamu dhe golat e Qilimit, Ngo dhe Halilit vendosin takimin e javës së 11-të të Kategorisë së Parë, të luajtur në stadiumin “Selman Stërmasi”.Tirana e nis mirë lojën me Sentamu që ka një mundësi të mirë për të shënuar në minutën e  6-të të takimit, por goditja e tij godet shtyllën pingule. Greca dhe Sentamu janë lojtarët më aktivë në fushën e lojës. Kërkues deri në fund, bardheblutë arrijnë të shënojnë dy gola të shpejtë me anë të Sentamu në minutën  e 22-të dhe të 25-të.

Tirana është më e qetë pas shënimit të golit të dytë dhe ul disi ritmin, edhe pse aksionet në portën e Pogradecit nuk mungojnë, me të përhershmin Sentamu, që në këtë ndeshje shkëlqen. Sentamu ka një tjetër mundësi për të trefishuar rezultatin në minutën  e 36-të të sfidës, por gjuajtja e tij ndalet nga portieri. Minutat e mbetura të pjesës së parë nuk ndryshojnë asgjë për të dy ekipet. Edhe pse Pogradeci mundohet të reagojë, mbrojtja bardheblu është e pa thyeshme. Me rezultatin 2-0 të dyja skuadrat shkojnë në pushimin e pjesës së parë. Fraksioni i dytë i lojës nis sërish nën diktatin e Tiranës dhe me Yunus Sentamu që nuk ndalet.

Në minutën e  49-të sulmuesi i bardhebluve bën tripletën duke u dhënë një tjetër goditje liqenorëve.  Por bardheblutë nuk ndalen dhe nuk kënaqen me kaq. Në minutën e 59-të të takimit është Qilimi ai që mendon për të shënuar dhe golin e katërt për ekipin e drejtuar nga Ze Maria. Ekipi i drejtuar nga trajneri Brazilian në këtë ndeshje shkëlqen, Ngo është ai prej të cilit nisin shumë aksione. Kështu ndodh dhe në  minutën e 72-të të sfidës, kur Ngo nxjerr të vetëm me portierin Grent Halilin, që ndëshkon sërish pogradecarët duke shënuar golin e 5-të të sfidës.

Tirana ka dhe disa mundësi të tjera deri në fund të takimit, por bardheblutë shpërdorojnë dhe nuk arrijnë të thellojnë më shumë rezultatin. Në minutën e 88-të është Ngo, që nga pika e  bardhë e penalltisë shënon dhe golin e gjashtë për ekipin e Tiranës. Me këtë fitore ekipi i drejtuar nga Ze Maria shkon në kuotën e 28 pikëve duke lënë pas Bylisin që ka ende një ndeshje për të luajtur.

Tirana: Lika, Doka, Cake, Uelison, Qilimi, Karabeci, Çelhaka, Sentamu, Maveje, Greca, Ngo. Trajner: Ze Maria.

Pogradeci: Mali, Kllogjiri, Topllari, Hysenllari, Pura, Kame, Jahaj, Liçkollari, Lame, Shyti, Pere/ Trajner: Festim Fetollari

Më shumë nga Kategoria e Parë