Zbigniew Boniek nuk fshihet. Zëvendëspresidenti i UEFA-s foli në “Vikonos Web Radio” mbi situatën e komplikuar që po kalon Juventusi, por mbi të gjitha iu përgjigj zërave se “qeveria” europiane e futbollit është kundër klubit bardhezi:
“Shoh gjëra të çuditshme, lexoj që UEFA mund të hakmerret. Duke e njohur Ceferin, e them qartë, edhe si zv.president i UEFA-s, se kjo është e pakuptimtë. Nuk do të ketë hakmarrje, për më tepër shpresoj që Juve të kthehet në rrugën e duhur.
Ka shumë probleme, është historia e penalizimit në mes, por edhe çështje të tjera të pazgjidhura. Ata që kanë qenë në krye të Juventusit vitet e fundit kanë ecur në rrugë të pafalshme”.
Më pas, Boniek vazhdoi të fliste për Napolin: “Lamtumira e Spallettit? Nuk kam informacion për këtë çështje. Ka një ajër divorci, nuk e prisja këtë ndarje. Ka shumë respekt mes tyre, por largimi nga Napoli nuk është i lehtë.
Nëse Luciano e ka marrë këtë vendim, padyshim ai dhe presidenti De Laurentiis nuk ishin në të njëjtën gjatësi vale. Në jetë nuk ka nevojë për trajnerë të afirmuar. Italiano është një trajner që më intrigon, kam lexuar për Luis Enrique, apo edhe rikthimin e Benitez, por nuk më emocionon. I uroj Napolit të gjejë trajnerin e duhur”.
