Kukësi iu ka dhënë fund ditëve turke, duke mbyllur përgatitjet dimërore në Antalia. Prej andej është kthyer mbrëmë, duke marrë me vete ngrakesat fizike për çdo futbollist, paraqitjen e mirë në tri miqësoret e luajtura dhe kolaudimin e grupit.
Trajneri Armando Cungu do të fokusohet tashmë te kundërshtarët e radhës, në Kupën e Shqipërisë dhe kampionat, pasi t’i lërë të tijtë dy ditë pushim në Shqipëri. Në njoftimin e klubit verilindor bëhet me dije:
“Kukësi ka mbërritur në Shqipëri. Gjatë qëndrimit në Antalia, qytet të cilin ekipi ynë prej vitesh e përzgjedh për fazën përgatitore, kemi zhvilluar 3 ndeshje miqësore, si dhe nga dy seanca stërvitore në ditë. Stafi teknik ka vendosur që, pas fazës përgatitore, skuadra të bëjë 2 ditë pushim”.
Kujtojmë se nënkampionët e vendit do ta nisin zyrtarisht vitin 2019 me dy ndeshje: ndaj Apolonisë dhe Laçit. Sfida e parë është në kuadrin e Kupës së Shqipërisë dhe do të luhet më 23 janar, ora 14:00, ndërsa e dyta për kampionat. Kjo e fundit do të luhet më 26 janar, ora 14:00, për llogari të javës së 19-të të Kategorisë Superiore.
Për momentin, Kukësi mban vendin e dytë në klasifikim, në kuotën e 34 pikëve, tri të tilla më pak se Partizani kryesues. Objektivi i presidentit Safet Gjici është fitimi i titullit kampion, gjë për të cilën ka bërë edhe dy blerje të goditura në merkaton e janarit. Sulmuesi Shkurtaj dhe mesfushori Rroca kanë ardhur nga Luftëtari dhe janë tashmë nën urdhërat e trajnerit Cungu për pjesën e dytë të sezonit.