Leonardo synon të sjellë një mesfushor me përvojë te skuadra e PSG-së dhe për këtë arsye po punon për të mbyllur transferimin në Ligue 1 të Timoue Bakayoko. 24-vjeçari u rikthye te Chelsea këtë verë pas huazimit te Milanit, por ai do të largohet sërish nga “blues”.
Sipas “Sunday Express”, Leonardo ka një marrëdhënie të mirë me mesfushorin, duke qenë se kanë qenë të dy pjesë e kuqezinjve sezonin e fundit. Problem për drejtorin sportiv të PSG-së do të jetë konkurrenca e madhe për Bakayoko, që e kërkon edhe Monaco.
Mesfushori francez erdhi te Milani verën e kaluar pikërisht pas ndërhyrjes së Leonardo, që synon të përsëritë të njëjtin transferim edhe te PSG. Lojtari mund të transferohet në Paris sërish në formë huazimi për një vit, me të drejtë blerje verën e ardhshme.