Kapiteni i Vllaznisë, Gilman Lika, foli në lidhje me ndeshjen e radhës të Vllaznisë kundër Partizanit. Ai mendon se situatat duhet të qetësohen dhe sfida e radhës thjesht duhet të merret si e tillë dhe të mos ketë probleme. Shkodranët nuk “ia falin” të kuqve që i rrëzuan nga Kategoria kur humbën me Kamzën në shtëpi.
“E dini që Shkodra ka pak problem me Partizanin dhe i frikësohem kësaj pjese. Po përgatitemi dhe jam i mendimit që kjo ndeshje duhet të merret si e radhës. Hakmarrja më e mirë mendoj se është fitorja”, – tha ai për RTSH.
Sulmuesi i kuqebluve u ndal dhe te ndryshimet që ka përjetuar skuadra. “Kemi bërë një punë të mirë deri tani po duhet të vazhdojmë të qëndrojmë me këmbë në tokë. Ishte një fitore e rëndësishme sidomos në aspektin psikologjik pasi na jep shumë moral. Është e kaluar dhe morëm 3 pikë të rëndësishme. Ndeshjet vijnë e vështirësohen dhe ekipet e tjera po na njohin mirë duke na e vështirësuar”.