Lukaku “tradhton” edhe Belgjikën, nuk ia del për dy ndeshjet e para të Botërorit

21 Nëntor 2022
13:15
Alfred Lleshi

Perspektiva nuk është shpresëdhënëse për Belgjikën në Kupën e Botës, pas një disfate të vështirë kundër Egjiptit në miqësoren e fundit, përpara se të udhëtonte në Katar. Një nga lajmet më të këqija është Romelu Lukaku. Sulmuesi i Interit nuk është gati për startin e Botërorit të Katarit, rikuperimi i tij kërkon ende kohë.

Ai nuk luajti asnjë minutë kundër Egjiptit dhe prania e tij në “Katar 2022” është në dyshim. Në fakt, “Gazzetta dello Sport” njoftoi se do të jetë jashtë për të paktën dy ndeshjet e para të Kupës së Botës, kundër Kanadasë dhe Marokut, kështu që do të ishte në dispozicion vetëm për ndeshjen e tretë kundër Kroacisë.

Roberto Martínez është tifozi numër një i Lukakut, të cilin e njeh mirë që nga koha e tyre tek Everton. Me të në kombëtare u pa versioni më i mirë i sulmuesit, një mrekulli fizike, kur është pa lëndime. Tani për tani situata është krejt ndryshe. Dëmtimi i pësuar me Interin, dëmtimi i parë muskulor në karrierën e tij, po i krijon më shumë telashe nga sa pritej.

Pa Lukakun dhe me Hazard larg nga forma e tij më e mirë, opsionet e sulmit janë reduktuar në frymëzimin e De Bruyne. Roberto Martínez tërhoqi Batshuayi në miqësoren kundër Egjiptit dhe mund t’i jepte vazhdimësi sulmuesit të tij të dytë në mungesë të të parit.

Një tjetër opsion sulmues mjaft i rëndësishëm është ai i Openda. Lojtari i Lens ishte shumë i mirë në Kuvajt dhe ka ecur fuqishëm në Ligue 1. Ai mund të jetë një alternativë më shumë se interesante, megjithëse është gjithmonë larg Lukakut.

Lajme të tjera

Lajmet e fundit