Rinovimi mes Marcelo Brozovic dhe Interit është një zhvillim në proces. Kështu njofton sot “Gazzetta dello Sport”. Sipas kësaj të fundit, mesfushori kroat do të nënshkruajë zgjatjen e bashkëpunimit me zikaltrit deri në vitin 2024, me një pagë prej 4 milionë euro në sezon. Klubi nga “San Siro” do ta përshpejtojë procesin, duke riparë edhe klauzolën prej 60 milionësh, të pranishme në marrëveshjen aktuale. Kroati është titullar i padiskutueshëm, teksa e veshi fanellën zikaltër për herë të parë mbrëmjen e 11 marsit 2018. Që nga ajo kohë e tutje nuk e hoqi kurrë.

Antonio Conte e ka si trashëgimi nga Spalletti mesfushorin kroat dhe rritjen e tij të jashtëzakonshme. Brozo është lider në gjithçka, në fushë dhe në dhomën e zhveshjes, ku di të imponohet, por edhe të rrëmbejë buzëqeshjet e shokëve, të çimentojë bashkimin e grupit. Duhet të kujtojmë se Brozovic është lojtari që ka përshkuar më shumë kilometra në të gjithë Serie A, me një mesatare prej 12.523 metrash për ndeshje. Një “maratonomak” i vërtetë.