Kalimi nga motori Renault te motori Honda i ka dhënë një tjetër hov makinës Re Bull Racing, që në garën e zhvilluar pak ditë më parë në Australi bëri një paraqitje të mirë. Piloti Max Verstappen u rendit i treti, duke dueluar deri në fund me Lewis Hamilton për vendin e dytë, duke nxjerrë jashtë loje Ferrarin, që zhgënjeu.
Paraqitja e mirë e Red Bull ka befasuar edhe vetë Mercedes, që priste të duelonte me Ferrarin por u gjend në një betejë të papritur me makinën austriake. Për këtë arsye, Toto Wolff, shefi i makinës Mercedes, mendon se Red Bull mund të përbëjë kërcënimin kryesor këtë Botëror dhe jo “kokëkuqja” italiane.
“Në Australi, Red Bull ishte shumë pranë nesh dhe ishte e shpejtë. Këtë gjë e pamë ne në duelin që Max pati me Lewis si dhe në parakalimin që Red Bull kreu ndaj Vettel. Pra, kanë një makinë me motor të fuqishëm. Kjo e bën interesante garën për titull, madje rrit rivalitetin, pasi Red Bull mund të jetë një kërcënim real për ne. Janë në një nivel që duhen mbajtur nën mbikqyrje”, tha Wolff.