Milani synon në merkato dy lojtarë të Chelsea. Bëhet fjalë për Armando Broja, qendërsulmuesi shqiptar i lindur në vitin 2001, dhe Hakim Ziyech, marokeni 29-vjeçar, i ndjekur tashmë në verë nga klubi kuqezi.
Dy lojtarët kanë grumbulluar gjithsej 736 minuta aktivizim mes Premier League, Champions League dhe kupave të ndryshme, më pak se De Ketelaere në këtë periudhë të parë të sezonit te Milani. Duke pasur parasysh angazhimin e vogël te Chelsea, ka të ngjarë që të dy lojtarët të konsiderohen si largim nga klubi londinez.
Nëse për Ziyech negociatat e huazimit mund të materializohen që në janar, përballë një ulje të pagës, për Brojën, drejtuesit e kuqezinjve po punojnë për verën e ardhshme. Këtë e raporton “Tuttosport”.
“Patatja e nxehtë” në duart e drejtuesve kuqezinj është Rafael Leao. Raportet mediatike, edhe nga Anglia, kanë pohuar se Chelsea mund të përfshijë sulmuesin Armando Broja si pjesë e çdo marrëveshjeje të mundshme për të marrë Rafael Leao nga kampionët e Italisë.
Sipas “TuttoMercatoWeb”, Blutë e Londrës e vlerësojnë 21-vjeçarin shqiptar në rreth 35 milionë euro. Ai nuk mund të përjashtohet që të përfshihet në një marrëveshje shkëmbimi me portugezin e Milanit. Po kështu, në tavolinë si “mall shkëmbimi” ofrohet edhe Ziyech.
Pavarësisht se shënoi golin e tij të parë për klubin londinez në fitoren kundër Wolves, dhjetë ditë më parë, nuk ka qenë një sezon i madh për sulmuesin e ri. Ai është shfaqur në disa ndeshje për blutë, megjithatë nuk ka marrë më shumë se 10 minuta për lojë, çka nuk i përmbush ambiciet e shqiptarit.
Kjo mungesë e kohës së lojës e bën atë një objektiv të dukshëm për skuadrat rivale, me kampionët e Serie A që janë një nga klubet e interesuara për marrëveshje. Raporti mediatik në fjalë pretendon se kjo mund të realizohet, me Rafael Leao të drejtuar nga ana tjetër. Milani ende po përballet me vështirësi në rinovimin e anësorit shumë të talentuar luzitan.
Palët po negociojnë për të nënshkruar një marrëveshje të re, por ende nuk ka “tym të bardhë”. Ofertat e mëdha financiare e joshin Leao, ndaj po heziton për momentin. Chelsea u raportua gjerësisht se dëshironte të nënshkruante me të në fund të kësaj vere, por nuk ka hequr dorë.
Drejtuesit e “Stamford Bridge” patën dy shikime të dorës së parë të asaj që ai mund të ofrojë, kur skuadrat u përballën me njëra-tjetrën në fazën e grupeve të Ligës së Kampionëve. Tifozët e Chelsea pa dyshim do të duan që Brojës t’i jepet shansi i duhur në ekipin e parë përpara se të merret ndonjë vendim për ta lënë të largohet.
