Finalja e Champions League mes Totttenham e Liverpool kishte dy komentatorë të jashtëzakonshëm në Bein Sports, sepse rrjeti i fuqishëm televiziv bashkoi në një studio Jose Mourinho e Arsene Wenger, dy ndër trajnerët më të mëdhenj në qarkullim, rivalë të egër në Premier League.
Para dhe pas ndeshjes, një analizë perfekte e supërsfidës së Champions League, mes dy legjendash që si rrallë më parë nuk patën debat mes tyre dhe në disa raste ishin plotësisht dakord.
Wenger përmblodhi pjesën e parë të ndeshjes dhe tha se Tottenhami ishte mjaft dobët në 45 minutat e para, duke u kthyer nga Mourinho, i cili miratoi.
"Liverpool kryeson me meritë, mbrohet, shkon në kundërsulm dhe e bën me shumë zgjuarsi. Më duket se herët a vonë do shënojnë golin e dytë. Tottenham nuk duket i rrezikshëm. Folëm për Harry Kane, nuk duket gati dhe në sulm vetëm Son duket kërcënues", tha Wenger në pushimin e ndeshjes.
Mourinho ishte në një linjë: "Realiteti është që Tottenham pati 61% të zotërimit të topit, por nuk e goditi asnjëherë portën dhe bëri shumë gabime në pasim. Harry Kane ishte i fshehur, nuk u bë asnjëherë pikë referimi në sulm.
"Liverpool nuk luajti ndonjë ndeshje fenomenale, por e kontrolloi ndeshjen. Dy anësorët e mbrojtjes po punojnë shumë mirë, topat e gjatë të Van Dijk gjejnë gjithnjë një nga sulmuesit".
Pas ndeshjes Mourinho pati elozhe të mëdha për Liverpool dhe Klopp: "Skuadër e shkëlqyer, trajner i shkëlqyer, klub fantastik dhe tifozë të mrekullueshëm. Nëse Reali fitoi 3 Champions rresht, nuk shoh ndonjë arsye pse ky Liverpool të mos e bëjë këtë gjë. Juventus, PSG, Bayern, Manchester City, Barcelona, Real Madrid, Atletico Madrid, Liverpool, Chelsea paksa e vështirë, por janë 7-8 klube që do duan ta fitojnë Champions League. Interi gjithashtu, ka ambicie dhe trajner të ri, por i duhet kohë, ndoshta pas një viti".
"Liverpool është qyteti i muzikës, klasës punëtore dhe futbollit, të gjitha u bënë bashkë sonte. Për çdo trajner që ka punuar në Angli, Liverpool është një vend i veçantë dhe aty mund të ndodhin gjithnjë mrekulli. Tani duhet të përmirësojnë ekipin, por pa shkatërruar pikat e forta. Ata duhet të bëjnë shumë kujdes tani, sepse kur mundohesh të përforcosh një pikë të dobët, mund të shkatërrosh diçka që ka qenë pika jote e fortë", tha Wenger.
Mourinho foli edhe për Premier League: "Së pari, mendoj se vendet 5-6 në Premier League janë tepër të mira për Europa League. Para dy vitesh ishim në finale me United, vjet Arsenali në gjysmëfinale, sivjet 2 angleze në finale, vitin e ardhshëm ndoshta United-Arsenal do shkojnë në finale, sepse Premier është kampionati më i fortë, me një grup ekipesh që mund të luajnë Champions League çdo vit, 6 ekipe. Nëse kalon në Europa League, bëhesh automatikisht favorite e madhe, ndaj nuk u habita nga finalja Arsenal-Chelsea. Rezultati ishte gënjeshtar, sepse Arsenal e nisi mirë dhe luajti mirë, por Chelsea në pjesën e dytë me disa nga lojtarët e vet cilësorë ndryshoi ndeshjen".
Në fund, e ardhmja e secilit trajner mbeti në mister: "Nuk jemi këtu për të ardhmen time, por për këtë finale", tha Mourinho, ndërsa Wenger lëshoi një batutë: "Doni ta mbyllni mbrëmjen me ndonjë lajm të fortë? Më vjen keq, por nuk mund t'u japim ndonjë lajm të tillë".
Mourinho vijoi me humor: "Nëse ne kthehemi në futboll, nuk do na keni në studio. Ndajeni mendjen, nëse doni që të dalim më shpesh këtu, mos na kërkoni të kthehemi në stol".
