Inter-Sanchez, treni i fundit… Për kilenin duket se ka ardhur momenti që të tregojë vlerat dhe të mos mbetet vetëm një peng i karrierës që pati më shumë hije se sa dritë.

Alexis Sanchez arriti në Udine në një moshë shumë të re. Friulianët e blenë atë në vitin 2006 nga Cobreloa, përpara se ta kthenin në huazim te Colo Colo dhe, në 2007-2008 te River Plate.

Në verën e po atij viti, klubi bardhezi vendosi të mbështetej fuqimisht te Nino Maravilla dhe e mbajtën atë në Udine për 3 vjet, gjatë së cilës Sanchez u tregua si një nga perspektivat më interesante në futbollin botëror.

Në verën e 2011 ishte Barcelona që u magjeps nga “Nino”. Udinese do të arkëtonte plot 37.5 milion, përfshirë edhe bonuset. Në “Camp Nou” Sanchez tregoi vazhdimësi në rrugën e tij të rritjes, por sërish i mungoi ai hapi i fundit për t’u bërë “top player”.

Pas 3 vitesh te katalanasit, fluturoi për në Angli. Në vitin 2014, në fillim të merkatos, Arsenali vendosi bast mbi Sanchez, duke paguar thuajse 50 mln euro (shifra më e lartë për një lojtar kilen).

Plot 4 vjet në Londër, nga 2014 deri në 2018, duke mos lënë gjurmë dhe duke qenë më së shumti një premtim që nuk shpërtheu. Në Janar 2018, me skadimin e kontratës disa muaj më vonë, Manchester United fitoi një luftë të ngushtë me Manchester Cityn për ta siguruar atë.

José Mourinho e dëshironte dhe klubi e kënaqi duke paguar 20 milion euro neto në sezon për rrogën e kilianit. Rrugë e kundërt për Henrik Mkhitaryan, i cili shkoi te Arsenali.

Në Old Trafford, përkundër pritjeve, Sanchez nuk do të gjejë kurrë vazhdimësinë. Pjesa tjetër është pak a shumë e njohur si histori, me huazimin te Interi sezonin aktual dhe blerjen, e bërë tashmë zyrtare, në funksion të 3 viteve të ardhshme.

Mosha ka ecur, por ky mbetet treni i fundit për Sanchez!