Karim Benzema pranon se rekordet “janë për t’u thyer”. Bomberi i Real Madridit të tanishëm kërkon t’i rrëmbejë “fronin” njërës nga ikonat e “Los Blancos” së të kaluarës në një skenë të Ligës së Kampionëve. Cristiano Ronaldo i ka rishkruar librat e historisë rregullisht gjatë kohës së tij në “Santiago Bernabeu”, por ndërkombëtari francez e ka njërin nga rekordet e tij në horizont.
Benzema ka qenë një zbulim për Realin këtë sezon, duke shënuar 44 gola në të gjitha garat dhe e di se një tjetër “hat-trick” evropian në finalen me Liverpool-in më 28 maj do ta bëjë atë më të mirë në këtë specialitet. Më konkretisht, ai do të thyente rekordin e Ronaldos nga një sezon i vetëm kontinental.
34-vjeçari, i cili duket se po përmirësohet me kalimin e moshës, i ka marrë me vete tashmë topat e ndeshjes (pasi ka shënuar tregolësha) në takimet me Paris Saint-Germain dhe Chelsea, në sezonin 2021-2022. Ai ka 15 gola në Ligën e Kampionëve në emër të tij, dy më pak se numri i jashtëzakonshëm i Ronaldos në sezonin 2013-2014.
Në lidhje me mundësinë e parakalimit të ish-shokut të skuadrës, Benzema i ka thënë faqes zyrtare të UEFA-s: “Rekordet do të ekzistojnë gjithmonë dhe ato janë aty për t’u thyer. Për mua, ajo që ka më shumë rëndësi është të jap gjithçka në fushë, ta ndihmoj ekipin tim të fitojë. Nëse mund të shënoj ose asistoj, kjo është e rëndësishme, por gjëja më e rëndësishme është të futem në fushë dhe të fitoj ndeshjen.
Karim Benzema is the first Real Madrid player to score 40 goals in a season since Cristiano Ronaldo 👏 pic.twitter.com/mQhAmLo1hn
— GOAL (@goal) April 27, 2022
Goli im i preferuar këtë sezon? Janë të gjithë të mirë dhe të rëndësishëm. Më i bukuri është ndoshta goli i tretë kundër PSG-së, ose penalltia kundër Manchester City, por edhe goditja me kokë kundër Chelsea ishte e mirë, sepse ishte një lojë e bukur”.
Ndërsa kërkon të imitojë Ronaldon në frontin e golave të Ligës së Kampionëve, Benzema ka gjithashtu një mundësi të përputhet me koleksionin e medaljeve evropiane të pesë herë fituesit të “Topit të Artë”.
Francezi e ka fituar katër herë Champions-in. Nëse triumfon edhe ndaj Liverpool-it më 28 maj, atëherë barazohet me CR7 edhe në këtë drejtim (me 5 Liga Kampionesh). Ky sallon “VIP” aktualisht përfshin Cristiano Ronaldon, Paolo Maldinin, Alessandro Costacurta, Jose Maria Zarraga, Hector Rial, Marquitos, Lesmes II dhe Alfredo di Stefano.
Benzema së shpejti mund të përballet me ato figura ikonike, megjithëse të gjithë janë ende duke ndjekur gjashtë herë fituesin e Kupës Evropiane (Champions-it) Paco Gento në krye të klasifikimit.
“Do të shoh nëse kam bërë historinë e klubit kur ta përfundoj karrierën time futbollistike, – shtoi Benzema mbi ambicien e tij personale. – Në çdo rast, të gjitha ndeshjet janë të rëndësishme për mua. Mundohem të bëj çdo herë diçka të re, t’i emocionoj fansat.
Sigurisht që është ëndrra ime për të fituar një tjetër Ligë të Kampionëve. Por ne duhet të përgatitemi vërtet mirë dhe të luajmë për të fituar në finale”.
