Ditën e djeshme u përhap lajmi i denoncimit të Massimiliano Allegrit ndaj ish-bashkëshortes së tij për përvetësim. Sipas trajnerit të Juventusit, ish-bashkëshortja do t’i kishte përdorur 10 mijë eurot në muaj, të destinuara për djalin e tyre, jo vetëm për mirëmbajtjen e tij, por edhe për shpenzime të tjera.
Për këtë ka ndërhyrë edhe gazetarja Caterina Collovati: “Karriera e zotit Allegri mund të përkufizohet shumë më edukuese sesa jeta e tij e dashurisë… E cila jo vetëm që duket e shqetësuar, dhe sigurisht këto janë vetëm punë e tij, por edhe e trishtuar nga zhvillimet.
Duke nisur nga lamtumira e papritur e Ambrës në vjeshtën e kaluar, tashmë është radha e një mosmarrëveshjeje me gjykatën për të menaxhuar një akuzë të saktë nga trajneri shumë i dekoruar ndaj një ish-i, nënë e një prej fëmijëve të tij, e cila kallëzohet në Prokurori për shpërdorim tërësisht ose pjesërisht të mirëmbajtjes së fëmijës që tani është 11 vjeç.
Ish-i hedh poshtë të gjitha akuzat, avokatët e saj flasin për akuza instrumentale me qëllimin e vetëm për uljen e kontributit mujor të paguar nga trajneri për nënën e fëmijës. Në përmbledhje, zonja merr një çek prej 10 mijë eurosh në muaj.
Duke jetuar në të njëjtën shtëpi me një vajzë tjetër nga një lidhje e mëparshme, duket qartë se disa euro të zotit Allegri i ka gëzuar edhe motra e vogëlushit. Do të ishte e tmerrshme nëse një nënë do ta linte një fëmijë të jetonte në mirëqenie dhe tjetrin jo. Nëse njërit i ofronte bukë e qepë, tjetrit mish e peshk…
Pyes veten, për një zotëri që merr 9 milionë euro në vit neto nga kontrata me Juventusin, le të themi 750 mijë euro në muaj…, cili është problemi? Deri në çfarë niveli mjerimi çon antipatia ndaj një ish-i? Le ta pranojmë sinqerisht: ka trajnerë të mëdhenj të Serie A, por ka edhe burra për Serie C”.
Marrëdhënia mes Allegrit dhe Ughi zgjati 13 vite, deri më 2017. Të dy kishin arritur një marrëveshje në gjykatën civile të Torinos, ku trajneri i Juventusit mori përsipër të paguante 10 mijë euro në muaj si detyrim për rritjen e fëmijës.
Më 2021, duke qenë se nuk ishte ulur në asnjë stol prej dy vitesh, Allegri kishte kërkuar uljen e shifrës në 5 mijë euro. Kërkesa u refuzua, prandaj u kundërpërgjigj me padi kundër Ughit.
