Lukas Podolski po jeton një rini të dytë në Japoni. Sulmuesi gjerman, i transferuar prej pak kohësh te Vissel Kobe pas eksperiencave me Koln, Bayern Munich, Arsneal, Inter dhe Galatasaray, mund të kthehet të luajë për një klub të Bundesliga-s një ditë.
Ka qenë vetë lojtari që ka folur për të ardhmen e tij në një intervistë të dhënë për "Bild". Gjithashtu, ai ka dhënë edhe një mendim në lidhje me zhurmën e krijuar për biftekun e artë të ish-shokut të skuadrës te Bayern-i, Franck Ribery.
Podolski ka dalë në mbrojtje të francezit dhe ka thënë: "Nuk më intereson nëse bifteku i ashte prej ari, apo argjendi. Për mua Ribery mbetet i njëjti njeri, pavarësisht ajo që ha".
"Sigurisht, ai ka gabuar me reagimin që ka patur ndaj komenteve të njerëzve, por këtë e di edhe vetë. Ai është një njeri shumë i mirë dhe kjo që ka ndodhur nuk ndryshon asgjë".
Në lidhje me të ardhmen: "Të kthehem në Bundesliga? Pse jo? Do të doja ta bëja, ndihem mirë dhe jam në formë, dua të luaj edhe për disa vite", ka përfunduar sulmuesi gjerman.