Dy ditë pasi humbi dueln ndaj Khabib Nurmadomedov në eventin UFC-242, sportisti Dustin Poirier ka deklaruar se synon të zhvillojë revanshin me Conor McGregor. Në një postim në faqen e tij zyrtare në “Twitter””, Poirier ka ftuar irlandezin të duelojnë sërish në kafaz.

“Në këtë pikë, unë mendoj se dueli i dytë mes meje dhe Conor ka shumë kuptim”, u shpreh “diamanti” Poirier. Sfida e parë mes dy sportistëve, zhvilluar në vitin 2014, u fitua me KO teknik nga irlandezi, që në raundin e parë.

Nuk ka vonuar dhe ka ardhur reagimi i Conor McGregor. Ai ka replikuar ashpër ndaj Poirier në lidhje më këtë sfidë, duke thumbuar amerikanin.

“Vëlla, unë e përplasa kokën tënde në tapet një herë pas vetëm 90 sekondash. Duhet të flasësh me më shumë respekt për mua, kur përmend emrin tim. McGregor nuk është thjesht sfidanti i radhës. McGregor është gjithmonë aty, McGregor është qëllimi. Gjithmonë! Pasi ta kërkosh revanshin kështu siç të thashë unë, atëherë do të nis të mendoj për ty”, tha irlandezi.