Kapiteni i Flamurtarit, Artim Pollozhani, u përzgjedh lojtari i ndeshjes pas takimit me Laçin. Ai mendon se skuadra e tij mori një barazim të merituar. Veterani i vlonjatëve e pranon se ekipi është shumë i cunguar dhe çdo futbollist që mungon ka vlerë të madhe dhe lë shenja.
Barazimi – "Për mënyrën se si shkoi ndeshja, ishte barazim i drejtë. Nuk ishte ndonjë futboll i bukur. Fusha nuk ta lejonte të luante me pasime dhe vertikalizime të shkurtra. Jemi të kënaqur dhe me një barazim".
Europa – "Jemi afër për Europën. Do e tentojmë deri në fund. Nuk kemi se çfarë humbim dhe do të jetë gjë e madhe për ne".
Grupi i cunguar – "Ju e shihni formacionin. Nëse te ne mungon njëri, duhet të aktivizosh lojtar të ri. Futëm Sukajn që është ende pa gjendje. Prishen ekuilibrat nëse mungon dikush. Janë të rëndësishëm çunat e rinj, e nuk diskutohet ata me eksperiencë".