Shumë skuadra do të ndryshojnë “lëkurë” ose “veshje” gjatë merkatos së verës, edhe pse pandemia do të detyrojë më shumë për shkëmbime dhe mundësi se sa në investime.
Mes klubeve që duan të ndryshojnë gjëra në organikë është edhe PSG, duke qenë se tashmë po pajtohen me faktin e largimit të Edinson Cavanit. Uruguajiani nuk ka pranuar të rinovojë kontratën dhe pritet të largohet në verë, për t’iu bashkuar Atletico Madrid për dy vitet e ardhshme.
Kampionët e Francës janë duke parë për zëvendësuesin e “Matadorit” dhe në fokus ka përfunduar, sipas medieve britanike, bomberi i Arsenalit, Pierre-Emerick Aubameyang Arsenal.
Oferta e parë për kapitenin e “Topçinjve” është 35 milion euro sipas “Mirror”. Verën e ardhshme, sulmuesi nga Gaboni do të mbetet pa kontratë dhe për këtë arsye në Londër nuk mund të pretendojnë më shumë në vlerë kartoni.
