Premier League

Ranieri, i mrekulluar nga Mourinho: I jashtëzakonshëm, i pari që më dërgoi mesazh!

Në të kaluarën, ata janë vënë përballë njëri-tjetrit me ngjyra të ndryshme. Gjithashtu, kanë qenë pjesë e rivalitetit të ashpër mes Juventusit dhe Interit. Jose Mourinho dhe Claudio Ranieri nuk kanë pasur kurrë një marrëdhënie idilike disa vite më parë, por situata tani duket se është plotësisht e kundërt.

Trajneri roman do të përballet me “Special One” të shtunën pasdite në “Old Trafford”, me Fulhamin e tij. Ai do të përpiqet të marrë diçka nga kjo transfertë, që ka ende shpresë për mbijetesën në Premier League, çka është objektivi kryesor, pas një makthi të fillimsezonit.

Ranieri vlerësoi kolegun e tij dhe rivalin në konferencën për shtyp. Ai përdori edhe fjalë të papritura për këtë, duke gjykuar nga përplasjet e kaluara: “Jose është një njeri i madh, si dhe një mik i madh. Ai më uroi rikthimin në Premier League, ishte i pari që më nisi një mesazh në telefon, duke më shkruar: “Mirëse u ktheve, gjithë të mirat”. Me të flasim për çdo gjë, bisedojmë shpesh. Ishte shumë i këndshëm dhe i sjellshëm me mua, që kur mori vendin tim te Chelsea”.

Një barazim në fushën e Manchester United, trajneri italian do ta mirëpriste si fitore: “Ne do të përballemi me një nga ekipet më të mira në kampionat. Edhe në Ligën e Kampionëve, “Djajtë e Kuq” po sillen shumë mirë. Një pikë do të jetë diçka e madhe për ne. E dimë se kemi nevojë për një lojë të përkryer, që ta marrim atë”.

Telesport është krenar që bashkëpunon me Krowd9, një aplikacion fantastik i futbollit për shqiptarët! Shkarkojeni > bit.ly/krowd9 për video me përmbledhje ndeshjesh, njoftime të menjëhershme për golat dhe të gjitha lajmet e Telesport! Krowd9 është i përdorshëm në shqip, italisht dhe anglisht.

Më shumë nga Premier League