Pas 16 muajsh pushim, Conor McGregor do të rikthehet në kafaz këtë fundjavë. Më 18 janar, në Las Vegas do të zhvillohet eventi UFC-246, ku irlandezi do të duelojë ndaj Donald “Cowboy” Cerrone. Një event ku biletat janë shitur prej kohësh, çka konfirmon interesin e fansave të arteve marciale mikse për Conor McGregor.
Duke folur për këtë sfidë ndaj Cerrone dhe rikthimin e tij në kafaz, irlandezi tha: “Për mua nuk ka rëndësi pesha ku dueloj. E doja këtë sfidë ndaj “kaubojsit” dhe do ta mundja në cilëndo peshë që ai do të dëshironte. Këtë sfidë do ta fitoj edhe sikur të jem i sëmurë me grip. Jam stërvitur mirë, kam qenë i fokusuar te rivali im dhe jam i lumtur për punën e bërë”.
Irlandezi do të debutojë në këtë peshë “welter” (pesha 71-77kg). “Kjo gjë më pëlqen, pasi do të provoj diçka të re. Ndaj dhe vendosa të dueloj këtu, ndaj Cerrone, pasi ndihem komod dhe e respektoj atë si rival. Ne kemi një histori mes nesh, jemi të dy familjarë që e respektojmë njëri-tjetrin.Gjithsesi, këtu ndihem me shumë energji, i karikuar dhe kjo fitore më hap shumë opsione për të ardhmen”, tha McGregor.
Gjithsesi, irlandezi konfirmon se do të rikthehet në peshën e lehtë, duke synuar një duel me kampionin e këtij Divizioni, Khabib Nurmagomedov. “Nuk kam mbyllur punë me atë peshë dhe atë njeri. Mund të zbres shumë shpejt peshë dhe të dueloj ndaj Khabib në çdo moment”, tha McGregor.
