Ajo e së martës ka qenë një mbrëmje për t’u harruar për Paris Saint-Germain, i mundur në shtëpi nga Manchester United.
Një hap mbrapa për një skuadër që vetëm dy muaj më parë luante në finalen e Champions League dhe që vinte nga pesë fitore radhazi.
Shtypi francez ka shpëtuar vetëm Keylor Navas, i vetmi që ka marrë notën 7 te L’Equipe dhe Le Parisien. Dhe nëse portieri është më i miri në fushë, atëherë…
Mbetje në klasë për treshen sulmuese Di Maria-Mbappe-Neymar që kanë koleksionuar nga një 4 në dëftesë te L’Equipe, ndërsa Le Parisien ka patur më pak mëshirë me një 3 për Di Maria-n dhe 3.5 për Neymar.
Më keq kanë shkuar gjërat për Florenzi-n: mbrojtësi i krahut i marrë nga Roma dhe që ka qenë një nga më të mirët të PSG-së në kampionat, të martën në mbrëmje ka marrë një 3 nga gazetarët francezë:
“Pritej shumë nga mbrojtësi i djathtë italian në një ndeshje të nivelit të lartë. Ka vuajtur shumë kundër Telles dhe nuk është parë kurrë në sulm. Gjë e pazakontë nga momenti i ardhjes së tij në Francë”, ka shkruar L’Equipe.
