Më në fund Valentina Shevchenko ia doli mbanë të shpallet kampione e botës në artet marciale mikse, duke triumfuar sot ndaj Joanna Jedrzejczyk në duelin për titullin kampion bote të peshës “flyweight”, titull që ishte vakant. Sfida u zhvillua në Toronto të Kanadasë dhe ishte e vlefshme për eventin UFC-231, aty ku Shevchenko, 16 fitore e 3 humbje në UFC, triumfoi ndaj rivales polake me vendim unanim të gjyqtarëve (të tri gjyqtarët votuan 49-46 për rusen me nënshtetësi peruane).
Shevchenko e meritoi fitoren, ishte shumë më lart se rivalja e saj Jedrzejczyk, e cila edhe pse rezistoi deri në fund, nuk arriti të jetë superior karshi kampiones së saposhpallur të botës. Për Jedrzejczyk ky ishte një shans i artë për t’u rikthyer kampione e botës, në një Divizion tjetër (ka qenë kampione në peshën strawweight), por nuk ia doli dot mbanë. Forma e shkëlqyer e Shevchenko, më kërkuese në kafaz, bëri diferencën në këtë sfidë.
Jedrzejczyk (15 fitore e 3 humbje në UFC) bëri maksimumin në kafaz, u përpoq ta godiste rivalen më këmbë në fytyrë, por pa sukses, ndërkohë që grushtet e Shevchenko bënë detyrën, duke goditur disa herë në fytyrë rivalen polake. Shevchenko ishte më efikase në sulmet e saj, por edhe në mbrojtje, duke mos i lënë shumë hapësira rivales dhe ky duel konfirmoi se kjo peshë është idealja për të.
Telesport është krenar që bashkëpunon me Kroëd9, një aplikacion fantastik i futbollit për shqiptarët! Shkarkojeni > bit.ly/kroëd9 për video me përmbledhje ndeshjesh, njoftime të menjëhershme për golat dhe të gjitha lajmet e Telesport! Kroëd9 është i përdorshëm në shqip, italisht dhe anglisht.
