Vendim i çuditshëm! Qeveria iu heq pasaportat diplomatike heronjve të “Euro 2016”

1 Prill 2021
13:33
Alfred Lleshi

Eh, si ndryshojnë kohët dhe interesat. Në vitin 2016, krejt shqiptaria jetonte dhe merrte frymë me kuqezinjtë, që na dërguan për herë të parë në histori në finalet e Kampionatit Europian. Të gjithë donin të merrnin pjesë në lavdinë e kombëtares së drejtuar nga De Biazi. Sidomos pushtetarët, kryeministri Edi Rama, që i priti me ceremoni madhështore djemtë kuqezinj (ju kujtohet parada me autobus të hapur nga Aeropoti i Rinasit deri në Kryeministri), duke i pritur edhe në zyrë. Më pas, iu priu për te Ministria e Jashtme, ku aplikuan për pasaporta diplomatike, që paskan pasur afat deri në vitin 2026.

Kjo vlefshmëri është reduktuar tashmë nga autoritetet tona qeverisëse, sikurse e tregon edhe shkresa e publikuar nga Andi Lila, që iu kërkon të gjithë poseduesve të pasaportës diplomatike ta kthejnë atë në zyrat konsullore, sepse afati është reduktuar deri më 31 qershor 2021. Ligji i 23.06.2016 qenka shfuqizuar!!! Tashmë kombëtarja nuk është aq vezulluese, sa për t’i ndenjur në hije, për të marrë nga meritat e saj, ndaj edhe heronjtë e “Euro 2016” duhet të pushojnë së qeni “ambasadorët më të mirë të Shqipërisë”. Gjykojeni vetë këtë zhvillim, që dëshmon hendekun e krijuar mes mazhorancës aktuale dhe futbollit në vendin tonë…

Lajme të tjera

Lajmet e fundit