Hoffenheim ka marrë një fitore epike në fund me shifrat 1-2 në sfidën e parë të javës së 11-të të Bundesligës. Në “RheinEnergie Stadion”, sistemi VAR u bë protagonisti kryesor, pasi në minutën e 98-të vendosi për 11-metërshin vendimtar.
Duhet thënë që sfida nisi më mirë për vendasit, të cilët këmbëngulën më shumë dhe në minutën e 34-të gjetën golin me anë të Cordoba, i cili u ndihmua edhe nga grushtimi i dobët i portierit mik.
Sidoqoftë, Hoffenheim reagoi në fillimin e pjesës së dytë me të sapofuturin Adamyan, i cili shënoi golin e barazimit.
Që nga ai moment, ekipet u treguan mjaft të kujdesshme dhe prodhuan pak lojë e raste. U duk se gjithçka po i drejtohej fundit, por në minutën e 94-të ka një rast të diskutueshëm. Nga sistemi VAR sinjalizojnë arbitrin kryesor që duhet të afrohet te monitori, me gjyqtarin që pas disa minutash dyshime, akordon 11-metërsh për miqtë.
Te topi paraqitet Locadia, me holandezin që shënon në minutën e tetë shtesë dhe gjithçka mbyllet pas 100 minutash, me Hoffenheim që feston një fitore heroike.