Kriminale, vetëm e tillë mund të përkufizohet ndërhyrja e një futbollisti serb të Crvena Zvezdas, Marko Gobeljić, të martën në mbrëmje ndaj një futbollisti lituanez, Vaidas Slavickas.
Kampionët e Serbisë përballeshin me Suduvën lituaneze dhe praktikisht gjithçka kishte marrë fund që në vajtje, sepse Crvena Zvezda fitoi 3-0.
Të martën në Beograd Crvena Zvezda kryesonte 2-0 pas një ore lojë dhe praktikisht vazhdimi ishte stërvitje, por 26-vjeçari Marko Gobeljić, mbrojtës i kombëtares serbe, kreu një ndërhyrje horror në mesfushë, duke i thyer kockat e kërcirit mbrojtësit kundërshtar. Slavickas, 33 vjeç, u çua me urgjencë në spital dhe do të operohet sot në Beograd, ndërsa karriera e tij ndoshta ka marrë fund tashmë.
Skuadra e Suduvës u trondit jashtëzakonisht nga ngjarja, ndërsa trajneri Vladimir Cheburin pas ndeshjes akuzoi futbollistin serb: "Ajo ishte ndërhyrje e paramenduar, nuk ishte aksident. Ai futbollist nuk duhet të luajë më futboll derisa të shërohet Slavickas. Mund të mungojë një apo dy vite, ndoshta nuk do luajë më futboll".